ما أريد غيرك وطن

من طرف **MASTER** الإثنين أبريل 27, 2009 10:17 am

يگولون الغربه تهون........ بس والله ميگدرون
يعيشون بعاد عن تراب الوطن........ لا والله ميصبرون
اليوم وباجر وبعد سنين....... نرجعلك يا وطن فرحانين
حتى اذا حنانه الوكت .......... موتنه بترابك يكون
غالي أنت والله وماتهون......صدگني ياوطن تملي كل العيون
يمر بينه الدهر وتاخذنه الاحزان.......منشوف بحياتنه مثل الوطن دار
الغربه ذله وما مثلهة ذله......وبعدنه عن الوطن اكبر مذله
انت بنبضنه وبروحنه...... وانت النه شمعة نورنه
الك وحشه والله بگلوبنه......نستنه اسمنه وحروفنه
تاج الراس اسمك يا وطن..... وجنة الاخره عيشتك وامل
صار الالم والخوف اصحابي ...... والامل والحلم بابي
الدمع شلال ينزل على الخدود...... من مي مغلي يذوب الجلود
السما والگاع والهوا والمي..... كلها اتصيح بسمك يا ضي
أتغيرت يا وطن واتغير كلشي بيك......بس تظل يا عراق كلشي حلو بيك
راح الفرح من حياتنه يوم اخذوك يا وطن......بس ترجعلنه حتى اذا مشى الزمن
اشعر برجفه لمن اسمك يگولونه.....واحس بدفو لمن لاحظانك يرجعونه
نرجعلك يا وطن مرفوعين الراس......ونحتفل احنه وكل الاطياف
بهيبتك يا عراق اتباهى اني ...... وارفع راسي بين البلدان والاهالي
خليني اكحل عيني بشوفتك ياوطن.....واحلي شفافي بتمرك العسل
لابارك الله بلي اخذك مني .....ومن احضانك الدافيه حرمني
متت يا وطن وشلون بحالي ......ادور عليك ايام وليالي
ادور عليك بين البلاد......بس لا اليوم ولا باجر الگي مثلك بلاد
بلاد الرافدين دجله والفرات...... بيك ارقى واشهر الحضارات
انذبحنه يا وطن بغربتك احنه انذبحنه....وين الي يرجع دمنه وكرامتنه
مصيبتك ياوطن ما مثلهة مصيبه......اتحملت وحدك الجراح بكل عزيمه
ثار الوطن ما مثله ثار.......ناخذه لو صارت بالحجار
العين اتنام والجسم يرتاح......ويظل البال يفكر بالجراح
جراح بعدك يا وطن........ وشوكت تطيب هالجراح